【台語讀寫班-心得分享 作者:王效琪】

學台語liáu-āu 作者：王效琪

達拉斯慈濟人文學校-中文暨人文課教師

學台語liáu-āu，guá tsiah 發現：原來 guá sī tsi̍t ê 對五歲到四十五歲 lóng bô sik-sāi台語 ê 台灣 gín-á. 雖bóng ē-hiáu 聽、iáu-m̄-koh 攏講 bē liàn-tńg，jî-tshiánn 嘛 bē-hiáu 寫、koh bē-hiáu 讀，真正是一隻台語 ê tshenn-mê-gû.

學台語liáu-āu，guá tsiah想--起-來：細漢ê時，guá siōng ài kóng ê 一句話tō-sī：「A-má，guá beh tsia̍h tse.」台語是guá tsū sè-hàn 開始 tō 熟似ê 語言、sī guá ê bú-gí.

學台語liáu-āu，guá tsiah 了解：guá 進前 kóng 台語 ê 時陣， thâu-khak內攏是用華語 teh 思考。就 tshin-tshiūnn guá tsit-má tī 美國 kà 華語，guá ê 學生 tī-leh 上課 ê 時陣，嘛是用英語 teh su-khó.

學台語liáu-āu， ta̍k lé-pài ê siok-tê 攏愛 lo̍k-im hōo 老師聽，guá tō ē-tàng 體會 guá ê 學生做功課做甲 kan-khóo-tsē-kuà ê 心情。Siunn-tio̍h án-ne tō 感覺 tsiânn tshù-bī.

學台語liáu-āu，guá tsiah 發現：故鄉美麗 ê 土地，iā sī muí 一个人心內 siōng kiau-ngōo ê 標誌。語言 kah 文化 nā-sī 會當透過文字 liû-thuân--lo̍h-khì，tō ē hōo 人民 koh kah ū 自信心。

學台語liáu-āu，guá tō ē-sái 大聲 kā 逐家 kóng：台灣 sī tsuân sè-kài 上媠 ê 所在，台語 sī tsuân sè-kài 上 suí-khuì ê 語言。