【台語讀寫班-心得分享 作者:葉信鴻】
學台語了後 作者：葉信鴻
（Ph.D in Chinese Linguistics, Stanford、Lecturer, Santa Clara University）
佇上這个課進前，我干焦會曉聽佮講，從來毋捌學過台羅字，所以這擺ê經驗hōo我加真濟對語言教育ê思考。
首先，我本身就是一个教華語十幾冬ê老師，佇日本抑是美國攏捌教過。佇咧教冊ê時陣，我受過ê訓練是一定愛hōo學生知影漢字ê讀音是啥物，因為佇生活中無人用漢語拼音抑是注音符號teh書寫。毋閣開始學台羅字了後，我才發覺其實用台羅字這款ê拼音系統顛倒較袂去受著漢字ê影響，所以這馬我煞較習慣看台羅字。
其次，我愈學愈感覺咱台語教育猶閣有真濟進步ê空間。這毋是干焦台語有這个問題爾爾，華語嘛有仝款ê困境。簡單來講就是會曉講台語無的確會曉教台語，會曉教台語嘛無一定會當共台語教甲真好耍抑是真心適。當然教啥物本身真重要，毋閣有時陣按怎教嘛是真要緊，比喻講，啥物先教啥物後教，用啥物方式會當吸引學生ê注意閣會當hōo in 佇上短ê時間內學著上濟物件，這就是有效率ê教法。
最後，我開始學台語了後，顛倒閣愈清楚咱台語ê文化產物真正無夠。雖然咱這班會曉講台語ê同窗真濟，毋閣真濟人攏是因為厝裡猶閣有人teh講台語 (比喻講阿媽)。若是厝內攏無人講台語閣無趣味台灣文化，對in來講，欲揣著動機來繼續學台語就真困難。凡勢以後教台語就像教外語按呢教--矣。
